Цврстата одбрана на Италија беше еден од клучните сегменти за освојување на титулата на Европското првенство лани, само двајца играчи од таа одбрана се очекува да започнат против Македонија во четврток.

Минатото лето избраниците на селекторот Роберто Манчини примија само четири голови во седум натпревари за втора европска титула на Италијанците во нивната историја. Џанлуиџи Донарума, Леонардо Бонучи и Леонардо Спинацола беа во најдобриот тим на ЕП, но само голманот Донарума ќе стартува против нас во полуфиналето од баражот.

Бонучи сè уште се опоравува од повредата на потколеницата и не настапи во победата на Јувентус (2:0) над Салернитана вчера. Неговиот соиграч Џорџо Кјелини штотуку се опорави од сличен проблем и вчера одигра само 45 минути. Бонучи и Кјелини најверојатно ќе го пропуштат натпреварот против Македонија, но би можеле да бидат достапни за потенцијалното финале против Португалија или Турција.

Според „Ла Гаѕета дело Спорт“, играчот на Интер, Алесандро Бастони ќе биде еден од почетните централни бекови во четврток, додека Џанлука Манчини од Рома е фаворит пред Франческо Ачерби од Лацио за другото место во централната одбрана.

Влезници за дуелот Италија – Македонија можат да се купуваат до вторник

Џовани Ди Лоренцо исто така ќе биде отсутен, десниот бек на Наполи заработи повреда на саботниот натпревар од Серија А против Удинезе и беше заменет од Матија Де Шиљо од Јувентус. Ди Лоренцо стана почетниот десен бек за „аѕурите“ по повредата на Алесандро Флоренци на воведниот натпревар против Турција на ЕП.

Емерсон Палмиери ќе стартува како лев бек повторно заменувајќи го Спинацола кој допрва треба да се врати на теренот по неговата повреда на Ахиловата тетива против Белгија во јули. На хартија, Емерсон и Донарума се единствените стартери од Евро 2020 во одбраната на Италија.