Екипата на Блокотехна оствари историски успех, стана втората македонска екипа по Фени индустри (2011 г.), која триумфира во БИБЛ-лигата откако во финалето на завршниот турнир со 82:68 ја совлада Теута.

Успехот на тимот од Негорци добива на тежина ако се знае дека екипата постои само две години, а на завршниот турнир во Приштина настапи без двајца клучни кошаркари, најкорисниот играч во лигата, Данило Мијатовиќ и капитенот Горан Главчев.

Победата на Блокотехна се наѕираше уште во првата четвртина која ја доби во своја корист со убедливи 25:9. Во вториот дел избраниците на Марјан Илиевски успеаја да го издржат налетот на домашните кошаркари и на полувреме заминаа со 12 поени разлика (42:30). Во третиот дел Блокотехна и го нанесе конечниот удар на Теута добивајќи ја четвртината со 28:15, по што стана јасно кој ќе слави на крајот.

Најрасположен за игра во редовите на новиот шампион на БИБЛ-лигата беше Брендон Пен со постигнати 31 поен. Божо Ѓумиќ забележа 17 поени, Петар Николиќ даде 15, а Марјан Младеновиќ  14 поени.