Во центарот на Техеран, на плоштадот Енгелаб, откриен е нов мурал кој испраќа предупредување до Соединетите Американски Држави да не започнуваат воена акција. Муралот прикажува оштетени авиони на палубата на носач на авиони, со порака на фарси и англиски јазик: „Кој сее ветер, ќе жнее бура“, објавува Скај њуз.

Откривањето на муралот следеше по изјавата на висок ирански функционер дека секој напад ќе се смета за „тотална војна против Иран“. Таа порака беше испратена пред пристигнувањето на американскиот носач на авиони УСС Абрахам Линколн и други воени бродови во регионот. Плоштадот Енгелаб, каде што е поставен муралот, вообичаено се користи за државни собири, а властите редовно ги менуваат муралите во зависност од националните пригоди.

Претседателот на САД, Доналд Трамп, изјави дека воените средства се преместуваат во регионот за секој случај, доколку се донесе одлука за преземање акција.