Ирак не планира да ја напушти Организацијата на земји извознички на нафта (ОПЕК), но ќе продолжи да бара „пофер“ квота за производство во рамките на таа организација, изјави ирачкиот премиер Али ал-Заиди. Тој истакна дека Багдад останува посветен на членството во ОПЕК, но верува дека квотите за производство треба подобро да го одразуваат производствениот капацитет и потребите за развој на Ирак, објави Ројтерс.

Изјавата дојде откако агенцијата во јуни објави, повикувајќи се на добро информирани извори, дека Ирак ја разгледува можноста за напуштање на ОПЕК доколку организацијата не одобри значително зголемување на нејзината квота за производство. Според тие изјави, ирачките претставници сметале дека постојните ограничувања го отежнуваат остварувањето на плановите за зголемување на извозот и приходите од нафта, кои претставуваат клучен извор на финансирање за државниот буџет.

Ирак е втор најголем производител на нафта во ОПЕК, веднаш по Саудиска Арабија, а е и една од петте земји основачи на организацијата, основана во 1960 година. ОПЕК и неговите сојузници, собрани во форматот ОПЕК плус, во последните години спроведуваат координирана политика на намалување на производството за стабилизирање на глобалниот пазар и поддршка на цените на нафтата.

Членовите имаат однапред одредени квоти за производство, а одредени земји, вклучувајќи го и Ирак, постојано бараат нивна ревизија поради зголемените производствени капацитети и инвестициите во нафтениот сектор.

Во последниве години, Ирак се соочи со предизвикот да ги усогласи своите обврски кон ОПЕК плус со амбициозни планови за развој на нафтената индустрија и зголемување на производството, што е од клучно значење за финансирање на реконструкцијата на инфраструктурата и јавната потрошувачка.

Цените на нафтата паднаа, индексите на берзите пораснаа