Поп-пејачот Влатко Лозаноски со години е дел од домашната музичка сцена градејќи кариера препознатлива по емоција, искреност и силна поврзаност со публиката.

Во разговор за „Слободен печат“, Лозано зборува за празничните денови, татковството и променетите животни приоритети, но и за концертот што го најавува во март во Скопје. Настанот, насловен „Километри љубов“ ќе донесе вечер исполнета со добро познати песни, нови изненадувања и силна емоционална атмосфера.

Божиќните празници поминаа. Колку овие денови од годината будат кај тебе посебно чувство и како ги прославивте?

– Божиќните празници секогаш носат едно посебно, тивко чувство на мир и благодарност. Тоа се денови кога човек природно се враќа кон себе, кон семејството и кон вистинските вредности. Кај мене будат и носталгија, но и радост, потсетник колку е важно да се биде присутен, искрен и благодарен. Ги прославивме во кругот на најблиските, без голема помпа, со топла атмосфера, разговори и моменти што не се мерат со време. За мене, тоа е суштината на празниците – љубов, спокој и споделување.

Сега кога си татко, колку празниците имаат поголемо значење?

– Откако станав татко, празниците добија сосема поинаква димензија. Сега тие не се само датуми во календарот, туку моменти што се паметат и се градат за цел живот. Преку очите на детето повторно ја доживуваш магијата, искрената радост и возбуда што некогаш и самиот си ја имал. Празниците станаа уште поважни затоа што преку нив се пренесуваат вредности, љубов, традиција, блискост… Се трудам тие денови да бидат исполнети со топлина и убави спомени, бидејќи токму тие моменти остануваат најдлабоко врежани.

Ајде малку за татковството и за семејството, како се снаоѓаш во улогата на татко?

– Татковството е најодговорната, но и најубавата улога што сум ја имал досега. Те менува од корен, те учи на трпение, на безусловна љубов и на тоа да ги гледаш работите од поинаква перспектива. Секој ден е ново учење и, искрено, уживам во секој момент, без разлика дали е лесен или предизвикувачки. Се трудам да бидам присутен и вистински вклучен, затоа што верувам дека времето и вниманието се најголемиот подарок што можеш да му го дадеш на своето дете. Семејството ми е темел и сила и токму од таму црпам инспирација и рамнотежа во сè што правам.

Колку те промени Марко? Успеваш ли да ги усогласиш настапите со времето поминато дома?

– Марко ме промени повеќе отколку што можев да замислам. Ми ги сменија приоритетите, ме направи поприсутен во моментот и ми даде поинакво чувство за одговорност и смисла. Со него научив дека вистинската сила е во тивките секојдневни моменти, а не само во големите сцени.
Не е секогаш лесно да се усогласи работата со семејниот живот, особено поради настапите и патувањата, но се трудам да направам баланс. Кога сум дома, се обидувам тоа време да биде целосно посветено на семејството. Верувам дека квалитетното време, искреното присуство и поддршката се клучни и тоа ми помага и како татко и како уметник.

Во март најави концерт во Скопје. Што подготвуваш за твојата публика и како одат подготовките и пробите?

– Концертот во март во Скопје за мене има посебна тежина и значење. Подготвуваме еден искрен и емоционален музички настан, со внимателно избран репертоар што ќе ги опфати песните што публиката ги сака, но и неколку изненадувања. Сакам тоа да биде вечер во која сите ќе се препознаат во музиката и емоцијата. Подготовките се во полн ек, пробите се интензивни, но исполнети со добра енергија и инспирација. Работиме на звукот, аранжманите и целокупната атмосфера, за концертот да биде комплетно доживување. Се радувам што ќе ја споделам таа вечер со публиката во арената, бидејќи токму таму ќе има посебна поврзаност.

Концертот е насловен „Километри љубов“… Колку песната „Километри“ ти остави посебен белег како музичар и зошто?

– „Километри“ е една од оние песни што тивко, но длабоко се врежуваат и кај уметникот и кај публиката. Таа ми остави посебен белег затоа што зборува за љубовта што опстојува и покрај дистанцата, времето и животните околности – тема во која многумина се пронаоѓаат.

Со текот на годините сфатив дека „Километри“ не е само песна, туку приказна што луѓето ја живеат на свој начин. Реакциите, пораките и емоциите што ми ги пренесува публиката околу оваа песна ѝ дадоа дополнителна тежина и смисла. Токму затоа и концертот го носи тој наслов – како симбол на љубовта што поврзува, без разлика на сите километри помеѓу.

Кога ќе се вратиш наназад, тешко ли беше да се наметнеш на домашната сцена и од кого имаше најголема поддршка?

– Кога ќе се навратам наназад, патот воопшто не беше лесен. Како и секој млад артист, морав да поминам низ многу предизвици, докажувања и моменти на неизвесност. Домашната сцена знае да биде предизвикувачка, но токму тоа ме натера да бидам истраен, искрен во тоа што го работам и да не отстапувам од својот музички идентитет. Најголемата поддршка секогаш доаѓала од семејството и од најблиските луѓе што веруваа во мене уште од самиот почеток. Секако, огромна улога има и публиката, нивната поддршка, доверба и љубов се она што ми даде сила да продолжам и да растам како музичар низ годините.

Денес, како изграден пејач, а сега веќе и татко, што би му рекол на младиот Лозано, кој првпат се појавува на сцената?

– Би му рекол да верува повеќе во себе и да има трпение. Да не се плаши од грешки и од падови, затоа што токму тие го градат и како човек и како уметник. Би му кажал да остане искрен кон музиката и кон себе, без разлика на трендовите.