ИНО ФАБ Лабораторијата организираше настан на Технолошко-металуршкиот факултет во Скопје на којшто беа промовирани иновативни проекти креирани од страна на перспективни млади умови.

Беше презентирана работата на тимовите „Дизајнирање и прототипирање на аеродинамичен објект” и на тимот „Green lazy bags oд текстилен отпад“ кои во изминатите месеци под менторство на професори и асистенти на Технолошко-металуршкиот и Машинскиот факултет ги креираа своите проекти.

Првиот тим работеше на дизајнирање на иновативно крило за мали летала кое е инспирирано од природата. Како што информираат организаторите, овој тим врз основа на повеќе истражувања и математички пресметки дојде до заклучок дека аеродинамичкиот објект (крило) направено според крилото на гуска има најдобри перформанси.

Крилото инспирирано од гуската има најголема заштеда на гориво поради помалиот отпор и има и поголема носивост на товар во тек на подолго време и долги растојанија. Прототипот на ова иновативно крило, кое може да најде примена и во ветерниците, беше испечатен на 3Д принтер во ИНО ФАБ ЛАБ, а неговите перформанси беа тестирани во специјална лабораторија на Машинскиот факултет, велат од ИНО ФАБ ЛАБ.

Производот на тимот „Green lazy bags oд текстилен отпад“, како што велат, привлече големо внимание, а гостите имаа можност и да го тестираат.

Станува збор за еколошки „lazy bags“ наполнети со различни полнила, вклучително и текстилен отпад од текстилната индустрија кој вообичаено завршува на депонија и креира големо загадување, додаваат од Лабораторијата.

На настанот се обратија и го споделија искуството Весна Иваноска генерален менаџер на Сеавус едукативен и развоен центар и Горан Митревски, сопственик и директор на КАБТЕЛ, компанија со експертиза и решенија за сајбер-безбедност, автоматизација и интеграција, бекап на податоци, мрежи и техничко обезбедување.

ИНО ФАБ ЛАБ е првата лабораторија за производство и прототипирање, а се наоѓа на Технолошко-металуршки факултет (ТМФ) во Скопје. Основана е од страна на Здружението ИНО ТЕХ КЛУБ во партнерство со Факултетот, а со поддршка од Фондот за иновации и технолошки развој, амбасадата на САД и неколку македонски компании.

Под менторство на академски професори, стучни лица од реалниот сектор, младите лица на возраст од 15 до 29 години имаат можност да развиваат и тестираат иновативни идеи и да создадат продукт-прототип.

Овој настан е поддржан од Американската амбасада во Скопје и Фондот за иновации.