Ракометарите на Црна Гора обезбедија пласман на Светското првенство што идната година ќе се игра во Полска и Шведска.

Црногорците во реваншот кој се играше во преполната сала „Морача“ со 33:25 ја совладаа Грција и ја анулираа негативата од првиот натпревар (23:25).

– Долго време ги „бркавме“, Грците се пргави, малку се фанатици, баш како и ние. Но, ние верувавме во победата и заслуживме да се пласираме на СП – изјави голманот Небојша Симиќ.

Најефикасни во редовите на Црна Гора беа Бранко Вујовиќ со 9 гола, Радојица Чепиќ и Милош Вујовиќ со по 5 гола, додека Небојша Симиќ на голот имаше дури 17 одбрани.

Кај Грција најрасположени за игра беа Димитриос Цирас со 8 и Николас Пасиас со 5 постигнати гола.

Пласман на СП обезбеди и Португалија која како гостин со 35:28 ја совлада Холандија и се реваншира за поразот на првиот натпревар (30:33). Мота даде 8 гола, а Хернандез 6 гола за Португалија, додека во редовите на Холандија најпрецизен беше Смитс со 7 гола.