Ема Хеминг Вилис продолжува да се залага за лицата заболени од деменција и нивната поддршка, преку новооснованата фондација „Ема и Брус Вилис“, чие основање го најави на хуманитарен настан во Њујорк. Ема во четвртокот ја прими наградата „Susan Newhouse & Si Newhouse Award of Hope“ на хуманитарниот настан „Hope Rising Benefit“, кој го организира Асоцијацијата за фронтотемпорални дегенерации, кога истовремено го најави и подигањето на Фондот „Ема и Брус Вилис“ за истражување на деменцијата и поддршка на негувателите.

Филантропскиот фонд, кој функционира во рамките на „Entertainment Industry Foundation“, е посветен на подобрување на разбирањето на фронтотемпоралната деменција (FTD) преку подигање на свеста, поддршка на перспективни научни истражувања и зајакнување на поддршката за луѓето кои се грижат за заболените, се наведува во соопштението за јавноста.

На настанот Хеминг Вилис ја прими наградата во свое име и во име на својот сопруг, Брус Вилис, на кого кон крајот на 2022 година, на 67-годишна возраст, му беше дијагностицирана оваа тешка болест.

„Неговата болест ме поттикна на ова“

„Ова патување ми ги отвори очите за реалноста со која се соочуваат многу семејства кога нивниот близок живее со фронтотемпорална деменција. Длабоко верувам во важноста на поддршката на истражувањата, но и во потребата од поддршка за негувателите кои секојдневно носат огромен товар. Се надевам дека преку овој фонд ќе го продлабочиме разбирањето за FTD и ќе обезбедиме семејствата кои се соочуваат со оваа болест да се чувствуваат видени, поддржани и помалку осамени. Брус отсекогаш бил дарежлив и срдечен човек, и знам дека би бил горд што овој проект им помага на семејствата кои поминуваат низ истото“, изјави Хеминг Вилис.

Семејството на Брус Вилис, вклучувајќи ја Ема, нивните ќерки Мејбел и Евелин, како и поранешната сопруга на актерот Деми Мур и нивните ќерки Румер, Скаут и Талула, првпат во март 2022 година објави дека му е дијагностицирана афазија. Во февруари 2023 година Хеминг Вилис потврди дека актерот добил попрецизна дијагноза, фронтотемпорална деменција.

Фронтотемпоралната деменција е заеднички назив за група мозочни нарушувања кои ги зафаќаат фронталниот и темпоралниот лобус, што може да доведе до проблеми со говорот, промени во личноста и губење на моторните способности.

Во насловната приказна на магазинот „Пипл“ минатата есен, Хеминг Вилис, која своето искуство и советите од експерти ги преточила во новата книга „The Unexpected Journey“ за да им помогне на другите семејства што поминуваат низ слична дијагноза, зборуваше за тоа како пронашла нова смисла додека се приспособува на улогата на негувателка.

„На почетокот бев многу изолирана и имав чувство дека ова се случува само на нас. Со текот на времето сфатив дека е корисно да се зборува за тоа и да се подигнува свеста, за луѓето порано да одат на лекар, порано да добијат дијагноза и да се вклучат во клинички истражувања. Ја напишав книгата каква што би сакала некој да ми ја дадеше на денот кога ја добивме дијагнозата. Грижата за болните е тешка, а многумина го прават тоа со многу мала или без никаква поддршка. Единствениот начин да поминам низ ова е да му помогнам на некој друг да се чувствува помалку осамено“, изјави сопругата на Брус Вилис.