Поранешниот претседател на Косово, Хашим Тачи, останува во притвор, одлучија Специјализираните совети на Косово во Хаг во нова, деветта по ред одлука за повторно притворање во случајот против него и четворица други обвинети за попречување на правдата, објави Н1.

Во одлуката од 2 јуни се наведува дека сè уште постои „реален ризик“ Тачи, доколку биде ослободен, да го попречи текот на постапката пред Специјализираните совети, како и да изврши нови кривични дела.

Судот процени дека поблаги мерки од притворот нема да бидат доволни за да се намалат тие ризици.

Една од наведените причини е можноста дека, доколку Тачи е на слобода, може да користи други луѓе или комуникациски уреди, што би го оневозможило ефикасното следење на неговите контакти.

Пред Специјализираните совети се водат две одделни постапки против Тачи.

Првата е главниот случај, во кој тој и други поранешни водачи на ОВК се судат по обвинение за воени злосторства и злосторства против човештвото. Втората е случајот за попречување на правдата, кој беше покренат поради обвинувања дека Тачи и другите обвинети се обиделе да влијаат врз постапката и сведоците во главниот случај.

Најновата одлука за продолжување на притворот е донесена токму во случајот на попречување на правдата. Сепак, при проценката на ризикот, судот ги зеде предвид и сведоците од главната постапка, вклучувајќи ги и заштитените сведоци, оценувајќи дека сè уште постои ризик од влијание врз нив.

Во одлуката, исто така, се наведува дека случајот за попречување на правдата се движи кон последната фаза, како и дека страните треба да бидат подготвени да ги достават своите конечни поднесоци до 19 јуни.

Основниот судски процес заврши и се очекува првостепената пресуда да биде објавена пред 20 јули.

Хашим Тачи не го пуштија од Хаг да го посети таткото во болница