Ланецот на продавници „Wawa“ во САД на 28 јануари објави дека имало обид за продажба на податоци. Според компанијата која идентификува сајбер-закани „Gemini Advisory Board“, информациите од кредитните картички се пронајдени на веб-локацијата „Joker’s Stash market“, каде имало податоци од 30 милиони кредитни картички, наведува „Digital Trends“.

Ова е досега трето по големина хакување на податоци од кредитни картички. Имено, кражбата на податоци од кредитни картички која се случи во 2013 година влијаела на 40 милиони луѓе, а пробивот на сигурносниот систем на фирмата „Home Depot“ во 2014 година изложил на опасност податоци од 50 милиони лица.

Податоците се продаваат по цена меѓу 17 и 210 долари по кредитна картичка, а цените се ниски поради фактот дека купците се свесни оти податоците од картичките се стари повеќе од еден месец, и досега истите можеби се променети од страна на злоупотребените лица.

Ланецот на продавници „Wawa“ и понатаму ги повикува луѓето кои се засегнати од кражбата на податоци да ги проверат изводите со своите кредитни картички и да пријават било каква лажна активност. Тие ги информираа своите купци за кражбата на податоци на почетокот на декември минатата година.

Хакувањето на податоци погодило повеќе од 850 продавници меѓу 4 март и 10 декември 2019 година, а загрозени се податоците на сите кои во „Wawa“ купувале со картички во тој период.