Груби уште не дал исказ, предметот за „црната листа“ е во предистрага
Поранешниот вицепремиер Артан Груби кој по 14 месеци бегство, се врати во Македонија и замина во куќен притвор, иако беше повеќе од пет часа во Обвинителството, не дал исказ за злоупотребите во Државна лотарија од над 8 милиони евра. Според последните информации од Обвинителството, неговата одбрана врши увид во доказите.
Препорачано
-Одбраната на осомничениот врши увид во доказите и тој се уште не дал исказ по однос на сомненијата за стореното кривично дело – велат од Обвинителството.
Тој е осомничен за „Проневера во службата“ затоа што претседавал со владина седница во моментот кога Владата ја задолжила Државната лотарија да набави ВЛТ-терминали за да почне самостојно да организира електронски игри на среќа. За ова кривично дело му се заканува затворска казна од најмалку четири години и нема максимална граница.
Досега нема обвинение за овој случај, а предметот со „црната листа“ се уште е во предистрага.
-Што се однесува до предистрагата во однос на информациите од објавената „црна листа“ на САД, надлежниот јавен обвинител презема дејствија на проверки за што беа дадени насоки и на Управата за финансиско разузнавање. Во текот на постапката обвинителот ќе ги преземе сите дејствија неопходни за целосно испитување на наводите – велат од Обвинителството.
Груби заедно со судијата Енвер Беџети се најдоа на црната листа на САД поради вмешаност во значителна корупција, политичко мешање и обиди за оцрнување на судството. Образложението е дека примиле мито да влијаат врз судските процеси поврзани со кривичната пресуда на ексдиректорот на Управата за безбедност и контраразузнавање, Сашо Мијалков, за масовното прислушување.
Властите го повикуваа Груби да се врати, а тој откако избега, на Фејсбук напиша дека отишол да заврши некои обврски и дека потоа ќе се врати кај неговото семејство. Од Блаце каде сам се предаде, замина во притвор во Шутка, но само на неколку часа, а потоа во Обвинителство, во Кривичниот суд. Обвинителството се повика на безбедносната проценка на АНБ и МВР, дека Груби не е безбеден во притвор во истражниот затвор и му одреди куќен притвор.
