Гравина: Не сакам да бидам гробар на италијанскиот фудбал
Претседателот на фудбалската федерација на Италија, Габриеле Гравина, е одлучен во намерата сезоната во Серија А да се одигра до крај.
Желбата на повеќето екипи е сезоната да стартува веднаш откако италијанската влада ќе го укине карантинот на 4. мај, но има и екипи кои се големи противници на доигрување на сезоната.
Според заговорниците за доигрување на првенството кои ги предводи Лацио, екипите би започнале со тренинзи уште на 4. мај, а сезоната би продолжила кон крајот на идниот месец и би се играле натпревари до крајот на јуни.
– Постојат две струи. Првата е која смета дека спортот треба да запре, а втората на која и припаѓам и јас, верува дека натпреварувањата може да продолжат. Не сакам да бидам гробар на италијанскиот фудбал, имам обврска да го бранам фудбалот – изјави Габриеле Гравина, претседателот на фудбалската федерација на Италија.
Иако е голем заговорник за продолжување на сезоната, Грива истакна дека тој нема да го има конечниот збор, туку тоа ќе биде Владата.
– Можете да замислите низ каква драма поминувам, постои процедура која мора да се испочитува. На министрите за спорт и за здравство им испративме протоколи и сега го чекаме нивниот одговор. Убеден сум дека Серија А ќе продолжи сезонава – додава Гравина.