Светската потрошувачка на вино достигна најниско ниво во речиси седум децении, според најновите податоци од Меѓународната организација за лоза и вино (OIV). Според извештајот за 2025 година, глобалната потрошувачка падна на околу 208 милиони хектолитри, најниско ниво забележано од 1957 година.

Најголемите светски пазари за вино, вклучувајќи ги САД, Франција и Италија, пријавуваат пад на потрошувачката. Во САД, потрошувачката е намалена за повеќе од четири проценти, додека Кина забележа еден од најголемите падови во светот – дури 13 проценти во споредба со претходната година.

Експертите наведуваат неколку клучни причини за слабеењето на глобалната побарувачка за вино. Меѓу нив се промената во начинот на живот на помладите генерации, зголемувањето на трошоците за живот и инфлацијата, но и сè поизразените здравствени трендови што поттикнуваат намалена потрошувачка на алкохол.

Дополнителен притисок врз винската индустрија создаваат климатските промени и нарушувањата во меѓународната трговија, што влијае и на производството и на дистрибуцијата на вино низ целиот свет.

Сепак, некои пазари покажуваат позитивен тренд. Португалија и Бразил се издвојуваат како ретки примери за раст на потрошувачката на вино, при што Бразил оствари раст од дури 41,9 проценти во споредба со претходната година.

По пивото, на пазарот се појави и безалкохолно вино

Аналитичарите предупредуваат дека винската индустрија би можела да се соочи со дополнителни предизвици во наредните години ако продолжи падот на интересот кај помладите потрошувачи и промените во навиките за консумирање алкохол.