Ѓоковиќ: Нема да откријам дали се вакцинирав или не
Најдобриот светски тенисер Новак Ѓоковиќ зборуваше за плановите за крајот на сезоната, односно на кои турнири планира да игра, како и за вакцинацијата. Ѓоковиќ најави дека планира во 2021 година да настапи на уште три натпреварувања.
– Засега планирам да играм на Мастерсот во Париз, завршниот Мастер во Торино и на Дејвид купот. Тоа е мојот распоред до крајот на сезоната. Во Белград треба да бидам до крајот на неделата, а потоа ќе заминам од Србија за да се посветам на тренинзите и подготовките. Сигурно останувам во Белград до крајот на неделата бидејќи тука децата ми одат на училиште, а на Стефан му е роденден за неколку дена и ќе имаме фамилијарна прослава – изјави Ѓоковиќ во интервју за „Блиц“.
Новак на почетокот од идната година, на Австралија Опен ќе има можност да дојде до 21 грен слем титула во кариерата и да им избега на Рафаел Надал и Рожер Федерер кои имаат по 20 освоени титули од најголемите тениски турнири. Но, за да настапи во Мелбурн, Ѓоковиќ и останатите тенисери и тенисерки ќе мора да исполнат одредени услови.
– Ја следам ситуацијата околу Австралија и колку што разбрав конечната одлука на австралиската влада и тениската федерација на Австралија ќе биде донесена за две недели. Не верувам дека многу ќе се менувааст условите во однос на тоа што веќе го знаеме како што беше случај и на почетокот од оваа година. Најверојатно ќе има некои ограничувања. Тоа што го слушнав од својот менаџер кој е постојан контакт со луѓето од тениската федерација на Австралија, е дека тие се обидуваат да ги подобрат условите за сите, и за тие кои се вакцинирани и за тие кои не се вакцинирани.
Ѓоковиќ на крајот не можеше со сигурност да потврди дали ќе игра во Австралија или не, како и дека нема да окрие дали е вакциниран.
– Јас си имам свој став. Нема да го откријам својот статус, дали се вакцинирав или не. Тоа е приватна работа и според нашите закони вие можете и да обвините некого поради такво прашање. Тоа е неумесно прашање. Денеска многу луѓе си земаат слобода да поставуваат такви прашања и и да осудуваат. Што и да одговорите: „Сум, не сум, не знам, размислувам“, тие ќе ги злоупотребат вашите зборови – изјави меѓу останатото Новак Ѓоковиќ.