Иако пред пет дена беше објавено дека повеќе нема да биде спортски директор на фудбалскиот клуб Вардар, Ѓоко Хаџиевски ќе остане на почесната функција.

Како што соопштуваат скопските „црвено-црни“, соработката со Хаџиевски продолжува и понатаму.

– Во името на клубот и во името на големата фудбалска легенда Ѓоко Хаџиевски, би сакале на целокупната јавноста да и ја соопштиме веста дека и покрај новиот тренерски ангажман во Саудиска Арабија, сепак почесната функција – спортски директор на ФК Вардар, ќе продолжи да ја одработува и понатаму, чесно и одговорно како и досега.

Важно е да напоменеме дека Хаџиевски во клубот работеше без притоа да потпише било каков договор , ниту па да побара било каков финансиски надоместок за сработеното.

Дојде затоа што почувствува потреба да му помогне на Вардар, и тоа во период кога многумина други Вардарови легенди го вртат грбот и кои за жал, се амнестираат себеси по прашањето на ФК Вардар. Соработката помеѓу клубот и господинот Хаџиевски продолжува и понатаму. Борбата за Вардар продолжува и понатаму! – стои во објавата на ФК Вардар.

Инаку, нашиот поранешен селектор во изминатиот период беше назначен за нов тренер на Хајер, второлигаш од Саудиска Арабија.