Германските обвинители поднесоа обвиненија против самопрогласената „криптокралица“ Ружа Игњатова, која со години се бара поради нејзината наводна улога во шемата за измама со криптовалутите OneCoin, објави ДПА.

45-годишната жена, која има бугарско и германско државјанство, е осомничена за поставување пирамидална шема за дистрибуција на Onecoin. Таа е на листата на ФБИ на 10-те најбарани криминалци во светот, како и на листата на Европол на најбарани лица.

Игњатова, чија компанија имаше седиште во западногерманскиот град Гревен, исчезна без трага во 2017 година. На 25 октомври истата година, таа отпатува од Софија до Атина и оттогаш не е видена.

Со обвинението, германските власти сакаат да спречат застарување на наводните кривични дела, изјави шефот на обвинителството во Билефелд, Карстен Новак.

Доколку окружниот суд во Билефелд отвори постапка, рокот на застарување ќе биде продолжен и ќе истече само за пет години. Истражителите се надеваат дека Игњатова ќе биде уапсена и изведена пред суд во тој период.

Во обвинението од 600 страници се наведени 17.500 жртви на наводната измама и штетата се проценува на 57 милиони евра. Обвинителството се ограничи на периодот 2015-2016 година. Сепак, се верува дека милиони инвеститори ширум светот биле погодени, а штетите изнесуваат милијарди евра.

Според полицијата во покраината Северна Рајна-Вестфалија, каде што се наоѓа градот Гревен, за време на истрагата биле запленети средства во вредност од околу 28 милиони евра.

Обвинителството во Софија ја обвини Ружа Игњатова за перење пари