Додека Германија се соочува со рецесија, а телевизиското рекламирање драстично опаѓа, RTL го започнува своето најголемо реструктуирање во последната деценија. Одлуката предизвика шок кај вработените и медиумската заедница, а новинарските здруженија ја нарекуваат катастрофа. RTL Deutschland планира да отпушти околу 600 работни места, вклучувајќи позиции со полно и скратено работно време. Извршниот директор Стефан Шмитер изјави дека компанијата влегува во тешка фаза на реструктуирање:

– Ќе го спроведеме реструктуирањето на општествено одговорен начин, со почит и транспарентност, иако ситуацијата е тешка – нагласи Шмитер.

Со работничките совети беше договорена програма за отпремнина, со можност за постепено пензионирање и други опции што треба да ги ублажат последиците од отпуштањето. Здружението на германски новинари (DJV) реагираше остро. Претседателот Мика Бојстер ја нарече одлуката на RTL катастрофа за вработените и подружниците на компанијата. Сепак, Бојстер рече дека ги цени напорите на компанијата да избегне целосни отпуштања:

– Планот можеби нема целосно да ги спречи отпуштањата, но ќе ги ублажи најлошите последици – рече тој.

Шмитер наведува дека RTL се соочува со два големи предизвици, длабока трансформација на медиумскиот пазар и тешка економска состојба во Германија. Од 2019 година, приходите од линеарно телевизиско рекламирање се намалија за повеќе од 20%, што покажува дека традиционалните модели повеќе не се одржливи. Сепак, позитивната страна е растот на платформата за стриминг RTL+, која бележи силен пораст на корисниците и приходите. Фокус на стриминг RTL+ моментално има повеќе од 6,6 милиони претплатници, со континуиран раст.
Се очекува платформата да стане профитабилна до 2026 година. Шмитер нагласува:

– Стримингот ќе биде клучен темел на нашиот бизнис. Мораме да ја прилагодиме организацијата на промените на медиумскиот пазар и конкуренцијата со американските стриминг гиганти. Компанијата планира годишни инвестиции во стриминг содржини од над 1 милијарда евра, со цел да се натпреварува со Netflix, Amazon и Disney+.

Буџетите за програмите сè повеќе ќе се префрлаат од линеарна телевизија на дигитални платформи. Реструктуирањето е само првиот чекор во трансформацијата на RTL. И додека вработените минуваат низ најнеизвесниот период, компанијата верува дека фокусот на стримингот и дигиталниот бизнис ќе обезбеди долгорочна стабилност – но по висока цена- пишува Каматица.