Германската амбасада во Белград денеска категорично го отфрли тврдењето на министерот на српската полиција Братислав Гашиќ дека убиецот на политичарот Оливер Ивановиќ од Косово е под заштита на германските власти, јави дописникот на МИА од Белград.

– Германската Влада нема сознанија кој го убил Оливер Ивановиќ на 16 јануари 2018 година. Категорично го отфрламе обвинението дека сторителот е под заштита на германските власти. Федералната влада не го примила барањето на српските власти за ова прашање, се наведува во соопштението на Амбасадата до агенцијата Бета.

Гашиќ вчера на седницата на српскиот Парламент изјави дека српските власти „точно знаат“ кој го убил Ивановиќ и дека сторителот е „под заштита“ на германските власти.

– Знаеме точно кој е убиецот и побаравме од германските власти, под чија заштита е тој човек, да ни дадат информации. Имаме снимено видео од аеродромот во Тирана, имаме слики од Приштина, имаме слики кога влегол во стан, изјави Гашиќ.

Ивановиќ беше лидер на Граѓанската иницијатива Слобода, демократија, правда, и беше убиен на 16 јануари 2018 година со повеќе истрели од огнено оружје пред седиштето на таа партија во северниот дел на Косовска Митровица.