Македонското олимписко таеквондо бележи нови добри резултати на меѓународната сцена, Дејан Георгиевски и Мила Рељиќ освоија медали на Австрија опен Г1 во Инсбрук.

Во сениорска конкуренција, Георгиевски во категоријата +87 кг дојде до бронзата по учинокот од две победи и еден пораз.

Во осминафиналето со 2:0 го совлада Иван Трајковиќ од Словенија, а триумфираше против уште еден Словенец во четвртфиналната фаза со истиот резултат против Патрик Дивковиќ.

Нашиот натпреварувач беше совладан во полуфиналната борба против Аболфазл Абасипоуја од Иран со 2:0.

Кај сениорките, Рељиќ беше бронзена во категоријата -62 кг, во првото коло со 2:0 во рунди ја победи Фатима Менди од Сенегал, во второто ја елиминираше Марија Леонова од Украина (2:0), а во четвртфиналето славеше и против Хрватката Хелена Кичема со 2:1.

Рељиќ во полуфиналниот меч претрпе пораз против Јулија Шпак (Полска) со 2:0 во рунди.