Јованка Јанкоска Бобе, која стои зад блогот bobesbakery.mk, фејсбук и инстаграм-профилот, е вистински кулинарски креативец – нејзините рецепти се милина и за очите и за непцето.

Бобе денеска споделува рецепт за вистински гурмански деликатес: тикварник.

– Традицијата доби нов вкус… Овој стар рецепт, пренесен од мојата баба, денес блеска во ново руво. Со додавање на изматена слатка павлака и мелени ореви, тикварникот добива божествена мекост и арома што буди спомени, но и создава нови – порачува Бобе.

Потребни состојки:

– 1 кг варена и пасирана тиква
– 3 јајца
– 150 грама шеќер
– 40 мл масло
– ½ лажичка прашок за печиво
– 1 ќесичка ванилин шеќер
– 1 лажица брашно
– ½ лажичка цимет
– ¼ кардамон
– ¼ лажичка мелено каранфилче
– 100 грама мелени ореви (за посипување)
– 150 мл слатка павлака (изматена, за декорација)

Подготовка:

Изматете ги јајцата со шеќерот и ванилиниот шеќер. Додајте ги пасираната тиква и маслото, па продолжете со матење додека не добиете мазна смеса. Потоа, со лажица измешајте ги брашното, прашокот за печиво и зачините.
Сипете ја смесата во намастен калап и печете 20 минути во претходно загреана рерна на 220 степени Целзиусови.
Кога ќе се излади, украсете со изматена слатка павлака и посипете со мелени ореви.
Мириса на есен, љубов и спомени.
На здравје сладење!