На следната пленарна седница на Собранието, закажана за утре, се очекува пратениците да расправаат за владиниот предлог за разрешување на државниот јавен обвинител Љупчо Коцевски.

Информацијата ја сподели претседателот на Собранието, Африм Гаши, на денешната средба со медиумите.

Тој појасни дека до овој миг сѐ уште не е испратено официјално известување до Коцевски дека на дневен ред ќе се најде точката за негово разрешување, но дека поканата треба да му биде доставена во текот на денот.

Коцевски: Не треба да има Анкетна комисија за Кочани, може да се компромитираат докази и сведоци

Според најавите, до крајот на декември се планирани уште четири пленарни седници. На 23 декември се очекува годишното обраќање на претседателката Гордана Сиљановска-Давкова пред пратениците, додека, пак, на 25 декември треба да се одржи седница посветена на пратенички прашања.

Гаши информираше и дека за целосно заокружување на Реформската агенда треба усвојување на уште два законски текста – Законот за јавни патишта и Законот за Судскиот совет.