Ливерпул постигна договор со Рен за ангажман на еден од најперспективните млади дефанзивци во Европа, 20-годишниот Французин Жереми Жаке. Англискиот гигант ќе плати обештетување од 55 милиони фунти, односно околу 63,5 милиони евра, со што францускиот клуб ќе оствари уште една исклучително профитабилна зделка во овој преоден рок.

Иако трансферот е договорен, Жаке нема веднаш да се пресели на „Енфилд“. Според договорот меѓу двата клуба, младиот стопер ќе остане во Рен до крајот на актуелната сезона, а дресот на Ливерпул ќе го облече дури во летниот преоден рок. Таквиот расплет беше во интерес и на францускиот клуб и на самиот фудбалер, а Ливерпул немаше ништо против одложеното приклучување.

За потписот на Жаке сериозен интерес покажуваше и Челси, но на крајот Ливерпул побрзо реагираше. Во целата приказна значајна улога има и можната разделба на Ливерпул со Ибрахима Конате, чиј договор истекува во јуни, што би отворило простор во одбраната токму на позицијата на која настапува Жаке.

Во меѓувреме, Рен реализираше уште еден крупен трансфер, откако официјално го продаде 18-годишниот француски младински репрезентативец Кадер Меите на саудискиот Ал-Хилал за 30 милиони евра.

Со овие два трансфери, францускиот клуб ќе инкасира речиси 100 милиони евра, потврдувајќи ја својата репутација како еден од најдобрите „продавачи“ на млади таленти во Европа.