Желбата на раководството на Голден Стејт Вориорс да го доведе Леброн Џејмс е една од најголемите приказни ова лето во НБА. Пред само неколку месеци идејата Леброн да му се приклучи на Стеф Кари во Сан Франциско изгледаше нереално, но одлуката на Дрејмонд Грин да стане слободен агент ја направи таа можност многу пореална, пренесува „Баскет њус“.

Грин ја одби својата играчка опција за сезоната 2026/27 вредна повеќе од 27 милиони долари, со што не само што му овозможи на Голден Стејт поголема финансиска флексибилност за ангажман на Леброн, туку им отвори простор и за уште едно големо засилување, кое го очекуваат во Ентони Дејвис.

Дејвис настапуваше заедно со Леброн Џејмс во Лос Анџелес Лејкерс од 2019 до 2025 година, а во 2020 ја освоија шампионската титула. Доколку Вориорс успеат да го донесат Дејвис, се верува дека тоа дополнително би го мотивирало Леброн да ја избере Голден Стејт. Во својата 24. сезона во НБА, четирикратниот шампион има само една цел, да се приклучи на тим што веднаш може да се бори за петтата титула.

 

View this post on Instagram

 

A post shared by Fanatics Sportsbook (@fanaticssportsbook)

Секако, таков трансфер би имал висока цена.

За да го добијат Дејвис од Вашингтон Визардс, Вориорс најверојатно ќе мора да го вклучат Џими Батлер во размената.

Батлер влегува во последната година од двегодишниот договор вреден 120 милиони долари, што го прави идеален кандидат за усогласување на платите со Дејвис, кој следната сезона ќе заработи 58 милиони долари.

Сепак, Вашингтон речиси сигурно би побарал повеќе од само Батлер. Шесткратниот Ол-стар сè уште закрепнува од повредата на предните вкрстени лигаменти (ACL), која ја заработи на 19 јануари, што значително ја намалува неговата вредност на пазарот.

Со оглед на тоа што нема јасен рок за неговото враќање, а во тој период ќе има 37 години, Визардс најверојатно би инсистирале и на избори од драфтот.

Вашингтон, кој го гледа Тре Јанг како ново заштитно лице на франшизата, гради помлад тим, па токму драфт-пиковите би биле клучниот дел од евентуалниот договор. Батлер, во тој случај, би бил вклучен главно поради усогласување на платите, а неговото лидерство и искуството од НБА финалињата би биле дополнителна вредност.

За Голден Стејт, ваквиот потег создава уште една причина Леброн Џејмс да ја избере оваа средина. Освен што повторно би играл со својот близок пријател Ентони Дејвис, би настапувал и со уште неколку добро познати соиграчи.

Што ќе се случи со Дрејмонд Грин?

Со одбивањето на играчката опција, Грин стана неограничен слободен агент. Но, тоа не значи дека планира да ја тестира понудата на пазарот.

Многу поверојатно е дека препознал можност да му помогне на клубот со тоа што привремено ќе се откаже од загарантираните пари. На тој начин Голден Стејт добива многу поголема финансиска флексибилност за да направи големи потези во текот на летото.

Грин целата своја НБА кариера ја помина во Голден Стејт, кој го избра во втората рунда на драфтот во 2012 година, со што стана една од најголемите легенди на франшизата.

Неговото лидерство, дефанзивната разновидност и несебичниот стил на игра се сметаат за непроценливи квалитети за тим што сака да доведе повеќе суперѕвезди.

Дополнително, Грин и Леброн Џејмс се долгогодишни пријатели. Ако еден од главните аргументи на Голден Стејт во разговорите со 41-годишниот Леброн е можноста повторно да игра со луѓе со кои има силна врска, тогаш задржувањето на Грин е од клучно значење.

Доколку Вориорс успеат да го разменат Дејвис, а потоа и да го потпишат Леброн како слободен агент, повторно би можеле да станат сериозен кандидат за шампионската титула.

Потенцијалната четворка составена од Дрејмонд Грин, Стеф Кари, Леброн Џејмс и Ентони Дејвис би била една од највозрасните во НБА, но доколку сите останат здрави, истовремено и една од најмоќните. Таков тим би можел повторно да доминира во Западната конференција, нешто што Голден Стејт се обидува да го постигне веќе неколку години.

Повеќе од фудбал: Зошто Холандија – Мароко е еден од најпосебните дуели на Мундијалот?