Турција мора да биде вклучена во сите европски одбранбени и безбедносни структури, изјави денеска претседателот Реџеп Таип Ердоган, една недела пред клучниот самит на НАТО во Анкара, објавија светските медиуми.

Неговите коментари доаѓаат во време кога Европа се обидува да ја обнови својата одбрана во услови на руска закана и ризик од повлекување на САД од НАТО, додека воената алијанса се подготвува за клучен самит во турската престолнина на 7 и 8 јули.

„Незаменливиот придонес на Турција кон европската безбедност понекогаш се занемарува. Очекуваме ваша поддршка, пратеници, за вклучување на Турција во одбранбените и безбедносните иницијативи објавени од Европската Унија“, им рече Ердоган на парламентарните делегати од сите 32 земји-членки на НАТО во Истанбул, велејќи дека Турција сака да учествува во сите одбранбени и безбедносни иницијативи на континентот.

Иако Турција технички има право да се приклучи на иницијативата SAFE, таа бара одобрение од сите 27 членки на ЕУ – нешто што Грција се закани дека ќе го блокира.

Турскиот лидер, исто така, го повика НАТО да ги отстрани сите пречки што ја блокираат трговијата во наменски индустрии меѓу членовите на алијансата.

„Ако сакаме да ги надминеме предизвиците со кои се соочуваме, мора да ги отстраниме пречките за трговија со наменска индустрија, а во исто време да обезбедиме избалансирана и фер распределба на товарот меѓу сојузниците“, рече турскиот претседател.

ЕУ има поголема потреба од Турција отколку Анкара од Унијата, вели Ердоган