Околу 200 туристи беа евакуирани со хеликоптер од долината Каунертал во Австрија откако силните бури предизвикаа повеќекратни лизгања на земјиштето што го блокираа сообраќајот и ги оставија посетителите заробени во планинската област, соопштија властите во австриската покраина Тирол, објавува австрискиот весник Курир.

По силната бура проследена со град во недела попладне, имаше неколку лизгања на земјиштето што го затрупаа патот и ја прекинаа единствената сообраќајна врска со долината.

Поради масата урнатини и камења што паднаа по планинските падини, потоците во долината беа блокирани и одеднаш надојдоа, а на едно место околу 50 метри од патот беа уништени.

Туристите, кои беа на еднодневни екскурзии, ја поминаа ноќта во планински засолништа и ресторани, а евакуацијата започна утрово со распоредување на два хеликоптери на австриската армија.

Според кризниот штаб, околу десет лица претходно беа евакуирани од медицински причини, додека немаше повредени или исчезнати лица во самите лизгања на земјиштето.

Патот низ ледникот Каунертал е еден од најпознатите планински патишта во Австрија. Води од Фајхтен во долината Каунертал до областа на ледникот Вајзефернер на надморска височина од приближно 2.750 метри.

Поради стрмните падини и бројните планински потоци, трасата се смета за особено склона кон одрони, лизгање на земјиштето и поплави за време на обилни дождови и грмотевици.

Die Evakuierung von Touristen, die im Kaunertal nach einem Murenabgang eingeschlossen waren, wird heute abgeschlossen. #Bundesheer pic.twitter.com/z3yMgpDuLE

— Michael Bauer (@Bundesheerbauer) June 29, 2026