Во срцето на индонезискиот остров Суматра, биологот Крис Торогуд од Универзитетот во Оксфорд и неговиот соработник Сепцијан Андрики, доживеале момент што ќе го паметат до крајот на животот.

Со денови и ноќи ја пребарувале џунглата, полна со тигри, во потрага по исклучително ретко растение, и на крајот успеале, па сè снимиле на камера, пренесува „Дејли мејл“.

Станува збор за растение кое ги произведува најголемите цветови во светот (до еден метар во дијаметар), додека развојот на пупката трае дури девет месеци.

Откривањето на овој неверојатен цвет, наречен „рафлесија хаселтии“ (rafflesia hasseltii), го расплака локалниот конзерватор и водич Сепцијан Андрики, а целиот момент го сними д-р Торогуд.

– Во ред е, успеавме! Го најдовме – го утеши д-р Торогуд својот соработник.

Инаку, ова растение произведува непријатен мирис што привлекува муви и бубачки – а тие носат полен, што осигурува дека растението ќе се размножува во густите тропски шуми.

Постојат неколку варијанти, а „рафлесија хаселити“ се издвојува по својата необичност. Познат под локалното име „Кендаван мука римау“ (Cendawan Muca Rimau), што значи „тигрова глава“, расте само во оддалечен дел од џунглата на Западна Суматра, каде што влезот е можен со посебна дозвола.

Special thanks to the foresters of West Sumatra – especially Pak Iwan and Bang Deki – for sharing their special flower with us: we’ll never forget it x pic.twitter.com/uRONuTErzw

— Chris Thorogood (@thorogoodchris1) November 19, 2025

Д-р Торогуд предводеше истражувачка експедиција со цел да пронајде и да го проучи необичното растение, на кое му се заканува исчезнување. Според проценките, 60 проценти од сите видови „рафлесија“ се соочуваат со сериозен ризик од исчезнување, додека 67 проценти од познатите живеалишта не се во заштитени подрачја.

Rafflesia hasseltii: a plant seen more by tigers than people. Watching this flower open by night was the closest thing to magic: pic.twitter.com/dNkgmk7pxu

— Chris Thorogood (@thorogoodchris1) November 19, 2025