Tимот на Мерцедес ги објави првите фотографии од својот болид за новата сезона во Формула 1, кој ќе има одредени освеежувања, но тука се секако и препознатливите сребрено-црни бои.

„Сребрените стрели“, кои минатата година водеа жестока битка за второто место помеѓу конструкторите и оваа сезона ќе настапат со непроменет возачки состав со Џорџ Расел и  Кими Антонели.

Новиот болид „W17“, како и неговите конкуренти, е помал, потесен и полесен во однос на претходникот, бидејќи е дизајниран и изработен според новите аеродинамички правила.

„Формула 1 во 2026 година влегува во период на големи промени, а ние сме подготвени за таа транзиција. Новите регулативи бараат иновации и целосен фокус во секој сегмент од перформансите. Работата на новиот болид, долгорочниот развој на погонската единица и напредните одржливи горива во соработка со Петронас го отсликуваат токму тој пристап. Објавувањето на првите фотографии од „W17“ е само следен чекор во тој процес и претставува заеднички, континуиран напор на нашите тимови во Бриксворт и Бракли. Ќе продолжиме напорно да работиме и во наредните месеци“, изјави извршниот директор на тимот Тото Волф.

Мерцедес следната недела ќе им се приклучи на останатите екипи во Шпанија на петдневниот „Barcelona Shakedown“. Осумкратниот светски шампион потоа на 2 февруари, ќе организира и официјален настан за отворање на сезоната, на кој пред новинарите ќе излезат возачите и раководниот кадар, но ќе биде прикажан и самиот болид.

Екипата по тој настан патува за Бахреин, каде што се закажани официјалните предсезонски тестирања. Планирани се два тридневни теста на кои тимовите ќе имаат можност дополнително да ги усовршат своите болиди пред стартот на сезоната.