Возач на камион загина, а неколку патници се повредени откако патнички воз излета од шините по сударот со камион во Западна Полска, соопштија полските служби за итни случаи, пренесува ТВП.

Несреќата се случила вчера попладне во близина на градот Рогозно, во западниот регион Великополска, на железничката линија што го поврзува градот со регионалниот центар Познањ.

Портпаролот на полицијата, Кристов Ползин, ја опиша како „сериозна несреќа“ на железнички премин без рампи во блиското село Гарбатка.

„Возот кој сообраќал од Рогозно кон Познањ се судрил со камион на преминот. Возачот е загинат“, изјави Ползин за јавниот сервис ТВП.

На местото на несреќата биле испратени шест екипи на брза помош, 14 противпожарни единици и хеликоптер за итна медицинска помош.

„Неколку патници се здобија со полесни повреди. Едно лице беше пренесено во болница, додека останатите повредени патници најверојатно нема да имаат потреба од хоспитализација“, рекоа од полската противпожарна единица.