Најголемата поп ѕвезда во светот, Тејлор Свифт е прогласена за личност на годината на магазинот „Тајм“ и се чини дека тоа воопшто не изненади многумина.

“Ова е најгордиот и најсреќниот момент во мојот живот. И ова е најкреативната, најисполнетата и најслободната фаза во мојот живот”, изјави Тејлор по објавувањето дека е личност на годината.

Тејлор Свифт заработи слични признанија од магазинот „Пипл“, кој ја прогласи за најинтригантна личност на годината за 2023 година, и „Форбс“, кој ја рангираше на врвот на својата листа на најмоќни жени во медиумите и забавата во светот.

На само 33 години, Свифт е добитничка на 12 нагаради Греми, што веројатно значи дека е на врвот на својата кариера. Таа стана најслушаната изведувачка на „Спотифај“ (Spotify) на глобално ниво оваа година, откако Бед Бани го држеше првото место три години по ред.

Нејзините песни собраа повеќе од 26,1 милијарди стримови од почетокот на годината.

Во ноември, таа ги собори рекордите на Греми со нејзината песна „Anti-Hero“, со што стана првиот изведувач кој доби вкупно седум номинации за песна на годината. Таа исто така освои Греми оваа година за најдобро музичко видео за „All Too Well: The Short Film“. Свифт освои девет награди на МТВ Видео музичките награди (MTV Video Music Awards), на крајот израмнувајќи го рекордот за најмногу освоени награди на една манифестација.

Нејзините вештини за пишување песни и деловна острина дури поттикнаа да започнат курсеви за неа, вклучувајќи ги и оние на универзитетите Стенфорд, Калифорнија, Беркли и Харвард.