Новинари, медиумски работници и хумани граѓани денеска учествуваа на четвртата крводарителска акција, која беше организирана од Самостојниот синдикат на новинари и медиумски работници (ССНМ) и Здружението на новинари на Македонија (ЗНМ) во соработка со Црвениот крст, со што беше одбележан Светскиот ден на слободата на медиумите.

Како што рекоа од ССНМ и ЗНМ, солидарноста е основа на новинарството – професија што се базира на заштита на јавниот интерес, секогаш во служба на граѓаните и заедницата.

„Овој ден потсетува декаслободните медиуми се столб на демократијата, а хуманите луѓе меѓу кои и новинарите се столб на секое општество“, рече Грнчаровска.

Претседателот на ЗНМ, Младен Чадиковски потсети на падот од шест места на Македонија на минатогодишниот извештај на „Репортери без граници“, а притоа рече дека „слободата на медиумите мора постојано да се брани и унапредува“ и „новинарството е тука да биде совеста и гласот на заедницата“.

„Со оваа крводарителска акција, испраќаме силна порака, дека сме тука едни за други, дека солидарноста не е само збор, туку вредност што ја живееме“, кажа Чадиковски.

Со aкцијата одржана во „Даре Џамбаз“ во Скопје, како и паралелно во клиничките центри во Охрид, Струмица и Битола, ССНМ и ЗНМ се приклучија на глобалното одбележување на 3 мај, како и на активностите на Меѓународната федерација на новинари, кои пак продолжуваат следната недела со чествување на 100-годишнината од основањето на оваа глобална организација.