Контроверзната слика на Пикасо, „Госпоѓиците од Авињон“, која предизвикуваше поделени реакции на обожавање и презир низ децениите, денес повторно е во фокусот на уметничката јавност преку реинтерпретацијата на американскиот уметник Хенри Тејлор изложена во Париз. Кога Пабло Пикасо првпат го претставил делото на своите колеги во 1907 година, реакцијата била речиси едногласно згрозување, при што Жорж Брак ја споредил сликата со пиење бензин, а Анри Матис ги нарекол прикажаните жени „грозни“, пишува „Би-би-си“.

Поради ваквиот прием, делото не било јавно изложено цели десет години, иако денес се смета за клучен момент во раѓањето на кубизмот и модерната уметност.

Сликата прикажува пет голи жени во бордел во Барселона со искривени и фрагментирани тела, стил кој Пикасо го развил под силно влијание на африканските маски и скулптури, иако тој подоцна упорно го негирал тоа влијание.

Хенри Тејлор во својата верзија насловена „Од Конго до главниот град и повторно црно“ директно ги предизвикува овие аспекти со тоа што ги претставува фигурите како црномурести, со што јасно укажува на африканското потекло на инспирацијата.

Додека кај Пикасо деформацијата на телата често се толкува како агресивна, верзијата на Тејлор внесува прашања за идентитетот и моќта, вклучувајќи ликови кои потсетуваат на Жозефина Бејкер.

Иако на почетокот била отфрлена, сликата до 20-тите била прогласена за револуционерна, а денес таа останува еден од најзначајните и најконтроверзните столбови на светската уметничка историја.