Јованка Јанкоска Бобе, која стои зад блогот bobesbakery.mk, фејсбук и инстаграм-профилот, е вистински кулинарски креативец – нејзините рецепти се милина и за очите и за непцето.

Бобе денеска споделува еден интересен рецепт, кој ќе ги израдува сите домаќинки, но и сите обожаватели на единствениот вкус на омиленото летно овошје – џем од јагоди.

„Џемот е дел од основите на слатките што на прво место ги будат емоциите за задоволство. Џемот од јагоди има прекрасна арома, слатко – сатенски вкус и прекрасна црвена боја“, порачува Бобе.

Состојки:

– 3 килограми јагоди
– 1 килограм шеќер
– сок од половина лимон

Начин на подготовка:

Јагодите исчистени и измиени се сечат на ситни парчиња. Се редат во тенџерето во кое ќе се варат: ред јагоди, ред шеќер и се оставаат во фрижидер, најмалку 3 часа, за јагодите да пуштат сок.

Јагодите се полеваат со сокот од лимон.

Потоа се варат на средна температура додека зовријат, па се намалува температурата и се варат додека да згусне џемот. Во текот на варењето се прави пена, која треба да се вади.

За да биде џемот мазен, сатенски, откако ќе згусне, повеќе од половина го блендирам и мал дел оставам парченца во џемот, па потоа го варам уште 10 минути на тивок оган.

Топлиот џем се сипува во топли тегли, па се затвораат и се превртуваат на капачето да постојат 15 минути за да се направи вакуум.

Напомена: Откако ќе отворите тегличка за користење, се чува во фрижидер.

На здравје сладење!