Музејот на Југославија, по големиот успех на филмот „Barbie“, се присети на омилената барбика на девојчињата во поранешната држава – куклата инспирирана од пејачката Лепа Брена.

„Додека целиот свет лудува по новиот филм ‘Барби’, ние од нашата колекција ја издвојуваме куклата направена по ликот на Лепа Брена. Овој производ, со ликот на познатата пејачка, е направен со албумот ‘Боли ме уво за све’, кој е дел од музиката за филмот ‘Хајде да се волимо 3’ од 1990 година. Иако е изоставена од актуелниот филмски спектакл, музејот е тука за да ја исправи неправдата и да потсети на овој важен југословенски придонес на Барбиленд“, напишаа оттаму во описот на фотографиите со познатата кукла.

Многу колекционери се заинтересирани за оваа кукла, која ја имаа многу девојчиња во Југославија. Денес вреди приближно 250 евра. Цената, се разбира, зависи од зачувувањето на куклата и опремата што оди со неа.

Интересно е и тоа што делови од куклата се продаваат засебно. На пример, одделно можете да купите само глава, рака или нога од куклата. Цената на поединечните делови се движи од 5 до 20 евра.

Ако Барби беше вистинска жена: Не ќе можеше да ја држи главата исправена, ниту да стои на нозе