ФОТО: Фудбалерите победнички одат на Евро 2020, рутински го совладаа Казахстан
Фудбалската репрезентација на Македонија со 4:0 ја совлада селекцијата на Казахстан на последната проверка пред историскиот настап на Европското првенство.
Избраниците на селекторот Ангеловски доминираа на теренот на Националната Арена „Тодор Проески“, креираа шанси, играа офанзивно и со таквата игра го натераа противникот да се брани но и покрај тоа успеаја да постигна четири гола.
Првиот шут во рамки на голот пристигна во 13. минута, кога Елмас се обиде од дваесетина метри, ама топката се движеше по земја и голманот Покатилов лесно ја скроти. Потоа шанса имаше и Тричковски но неговиот заврши во надворешниот дел од мрежата.
Најсериозната можност пристигна во 22. минута кога Тихомир Костадинов шутираше но голманот на Казахстан го запре ударот. Првиот гол, Македонија го постигна во 35 минута кога капитенот Пандев повлече контра, го проигра Елмас кој успеа да изнуди прекршок во казнениот простор на Казахстан по што судијата досуди пенал. Сигурен реализатор беше Езџјан Алиоски.
работата за избраниците на селекторот Ангеловски беше олесната откако во последните моменти од првиот дел црвен картон заработи Мужиков.
Доминантната игра како и предноста од играч повеќе на теренот, фудбалерите ја искористија на најдобар начин во второто полувреме, постигнаа три гола преку Тричковски, Ристовски и Чурлинов и во одлично расположение ќе патуваат за Букурешт каде на 13 јуни против Австрија ги очекува историскиот настап на ЕП.