Туристи кои го посетиле езерото Лох Нес, велат дека виделе темна форма, долга 65 метри како се движи веднаш под површината на водата неколку минути, пренесува британскиот „Телеграф“.

Етјен Камел, фармацевт од Лион и неговата сопруга Елијан, раскажуваат дека додека шетале покрај западната страна на езерото наводно го забележале познатото чудовиште од Лох Нес.

„Беше доста чудно. Јас сум човек на науката, па никогаш не верував дека чудовиштето од Лох Нес е вистинско, праисториско животно. Но, кога фотографирав, ја видов оваа долга, сенка. Со сопругата забележавме како се движи сенката“, изјавил Етјен.

Туристите биле во неверување кога на 150 метри далечина од езерото, виделе како во водата се создаваат бранови, како нешто да се движи. Трагата од овие бранови била долга 15-20 метри.

„Не можеме да кажеме дали е животно, но нешто се движеше под водата. Никогаш не сум видел вакви работи во езерата, а таму каде што живеам иам многу“, додал тој.

Инаку, првите приказни за чудовиштето наречено Неси, се појавија во 1933 година, откако Франческа Мекгарви од Каслхед, Пејсли, видела темна форма како излегува од водата. Во понатамошните видувања, тогашните извештаи во печатот велеа дека, наводното суштество личи на плезиосаурус, вид на морски рептил изумрен повеќе од 65 милиони години.