Фотографијата на Тобијас Визуелс, која прикажува два џуџести пингвини како стојат еден до друг и ги набљудуваат светлата на Мелбурн, повторно стана вирална, потсетувајќи нè на моќта на поддршката и заедништвото. Иако многумина овој призор го доживуваат како чиста емоција слична на човечката, биолозите појаснуваат дека пингвините се исклучително социјални суштества.

Тие често стојат блиску еден до друг за да одржат топлина, но и за да се чувствуваат безбедно. Сепак, кај оваа конкретна двојка, приказната е сосема поинаква.

Она што ја прави оваа фотографија дополнително трогателна е сведоштвото на волонтерите кои ја следеле оваа колонија. Според нивните набљудувања, се верува дека и двата пингвина ги изгубиле своите долгогодишни партнери. Во светот на пингвините, каде верноста е клучна, губењето на партнерот е огромен стрес.

Пингвините некое време биле забележани како редовно се среќаваат, стојат со часови еден до друг и заедно ги гледаат светлата на велеградот, како во тоа да наоѓаат некаква форма на меѓусебна утеха и мир.

„Во вакви времиња, навистина среќни се оние кои можат да бидат со луѓето што најмногу ги сакаат. Овој момент го забележав пред околу една година. Овие два пингвина стоеја на карпата со часови, потпрени еден на друг, набљудувајќи ги светлата на Мелбурн и океанот. Еден волонтер ми пријде и ми кажа дека посветлиот пингвин е постара женка која го изгубила својот партнер, а истото му се случило и на помладиот мажјак од левата страна. Оттогаш, тие редовно се среќаваат за да се утешат и стојат заедно со часови гледајќи во градот. Поминав три цели ноќи со оваа колонија додека не успеав да ја направам оваа фотографија. Поради тоа што не смеев да користам никакви светла, а малите пингвини постојано се движеа и меѓусебно си ги чистеа пердувите, беше навистина тешко да се фати кадар. Сепак, имав среќа во еден прекрасен момент. Се надевам дека ќе уживате во оваа сцена исто колку и јас“, напиша Тобијас на својот инстаграм-профил.

Потсетник за сите нас

Во свет кој често изгледа забрзан и ладен, овие две мали суштества станаа симбол на емпатијата. Нивната поврзаност ни покажува дека никој не треба да биде сам во својата тага и дека понекогаш е доволно само да стоите покрај некого за да му го олесните товарот.