Депониите од ѓубре собрани околу преполните контејнери во Скопје почнаа да се расчистуваат на одредени локации, но тоа не важи за Клинички центар каде и денеска граѓаните, кои поради здравствени проблеми посетија некоја од клиниките, можеа да посведочат дека и во болничкиот круг количеството на отпад не е за поценување.

Превртени контејнери од тежината на ќеси со отпад од непознато потекло, картонски амбалажи од дистрибуирани лекови, пластични шишиња, комунален смет и што ти уште не, претставуваат грда и потенцијално опасна состојба, особено што се очекува на Клинички центар хигиената да е на највисоко ниво.

Претпоставуваме дека во дивата депонија на клиниките не се „крие“ и медицински отпад кој би требало да биде складиран во специјални амбалажи и на соодветно место и транспортиран на согорување во „Дрисла“.

Погледнете како изгледаше денеска во кругот на Клинички центар.