Додека празничните светилки го осветлуваат градот, зад шанкот на „Каза бар“ се создаваат вкусови што ја доловуваат атмосферата на крајот од годината. Барот годинава беше „крунисан“ како прва „Палома“ амбасада на престижниот грчки бренд „Три сентс“ во Македонија и токму „Палома“ е нивниот најпрепознатлив коктел.

Барменот Никола Анастасијески, кој годинава го освои првото место на државното првенство на бармени во Македонија, подготви три новогодишни коктели, поделени по ниво на сложеност – од лесен за домашни услови, преку елегантен класик, до миксолошки предизвик за најхрабрите.

„Палома“

(најлесен за изработка – домашни услови)

Потребни состојки:

• 40 мл текила
• 10 мл свежо цеден сок од лимета
• Газиран сок од цитрон

Подготовка:

Работ на чашата се навлажнува и се посолува. Во чашата се додава текилата и свежиот сок од лимета, а потоа се дополнува со газираниот сок од цитрон.

Декорација:

Свеж цитрон

„Њујорк саур“

(потежок за припрема)

Потребни состојки:

• 40 мл виски
• 30 мл свежо цеден сок од лимон
• 20 мл шербет
• 10 мл варено црвено вино

Подготовка:

Во шејкер се додаваат вискито, сокот од лимон и шербетот и се „шејкаат“ 20 до 30 секунди. Смесата се процедува во чаша, а на самиот врв внимателно се додава вареното црвено вино.

Декорација:

• Дехидриран портокал

„Боемска“

(најтежок за изработка – миксологија)

Потребни состојки:

• 50 мл рум
• 15 мл цимет сируп
• 10 мл карамела сируп
• 10 мл обична вода

Пена:

• Сок од ананас
• Манго сируп
• Ксантан гума и метилгел (во соодветен сооднос)

Подготовка:

Во микс чаша се ставаат сите течни состојки и се мешаат додека смесата целосно не се олади. Потоа се префрла во чаша и се дополнува со подготвената пена.

Тука се чита весникот Слободен печат: МАПА на општествено одговорни угостителски објекти низ Македонија

Бар културата се движи напред: Каза Бар првата Paloma Embassy во Македонија