Коктел барот „Џезбина“, кој се наоѓа во Градскиот трговски центар, е вистински мал времеплов. Штом ќе влезете внатре, имате чувство дека сте се вратиле во 1920-тите – во време на џез, пригушени светла и коктели што се пиеле со стил.

Токму во таква атмосфера, за новогодишниот специјал на Слободен печат, барменот Вања Головски подготви три коктели инспирирани од класичната коктел-култура. Како што објаснува Головски, приказната започнува со „Марципан“, продолжува со „Старомоден“, а се заокружува со „Маџир маало“ – коктел посветен на старите скопјани. Иако лесни за изработка, овие коктели ги влечат своите корени од безвременските класици „Менхетен“, „Олд фешнд“ и „Амарето саур“, што ги прави идеален избор и за дочекот на 2026 година.

„Марципан“

Потребни состојки:

• 45 мл Дисароно
• 30 мл свежо цеден сок од лимон
• 2 капки ангостура битер
• 1 белка од јајце

Подготовка:

Сите состојки се ставаат во шејкер и најпрво се протресуваат без мраз, за да се добие фина и кремаста текстура. Потоа се додава мраз и повторно се шејка неколку секунди. Коктелот се процедува во чаша и се сервира.

„Старомоден“

Потребни состојки:

• 50 мл зачинет рум
• 10 мл ликер од мадагаскарска ванила
• 3 мл сируп од путер од кикирики
• 2 капки битер од орев

Подготовка:

Сите состојки се ставаат во микс-чаша со мраз и се мешаат со бар-лажица додека коктелот добро не се излади и вкусовите не се соединат. Потоа се процедува во чаша и се сервира.

„Маџир маало“

Потребни состојки:

• 50 мл виски од ‘рж
• 25 мл антика формула вермут
• 10 мл Педро Хименез шери
• 2 капки ангостура битер

Подготовка:

Сите состојки се ставаат во микс-чаша со мраз и се мешаат со бар-лажица додека коктелот убаво не се излади. Потоа се процедува во чаша.

Декорација:

• Кандирана цреша