ФОТО: „120 години од Илинденското востание – архивска меморија“ – патувачка изложба на Државниот архив
Со над 300 архивски документи и фотографии, на 1 август пред Македониумот во Крушево беше отворена изложбата „120 години од Илинденското востание – архивска меморија“, организирана од Државниот архив по повод манифестацијата „Десет дена Крушевска Република“. Како што соопштија од Државниот архив, документите се дел од архивските фондови, а се преземени од архивите во Истанбул, Софија и Белград.
Драго ми е што и оваа година Државниот архив е присутен со свои проекти на отворањето на манифестацијата „Десет дена Крушевска Република“. Оваа изложба ги прикажува: создавањето на македонската револуционерна организација, церемониите на заколнување на членството, дисциплината и солидарноста на Организацијата, нејзината структура, познатите војводи и револуционери, подготовките за Илинденското востание, текот и клучните вооружени борби со турската војска. На неколку паноа се прикажани и активностите што следувале по востанието, неговите последици и ефекти, како и конзулските известувања и објавите на светските печатени медиуми за него, изјави директорот на Државниот архив, Емил Крстески, по повод отворањето на оваа изложба во Крушево.
Идната недела изложбата ќе биде поставена во НУ Музеј на македонската борба во Скопје, а поради големиот интерес, изложбата ќе биде претставена во повеќе градови во државата.