На гала вечер во Скопје Ракометната федерација на Македонија (РФМ) ги прогласи најдобрите за изминатата натпреварувачка сезона 2024/25.

Во присуство на најистакнатите имиња од ракометната сцена, спортски работници, медиуми и гости од јавниот живот, се прослави уште една успешна ракометна година.

Настанот „Вечер на ракометари на Македонија 2025“ беше збогатен со музичка програма, специјални изненадувања и атмосфера достојна за нашите ракометари и ракометарки.

Пред изборот, церемонијата почна со едноминутно молчење во знак на почит за починатите Илија Темелковски и Александар Јовиќ, големи работници кои оставија значајна трага за македонскиот ракомет. Темелковски, постхумно, доби награда за особен придонес во ракометот.

За најдобар ракометар беше прогласен Филип Кузмановски од Еурофарм Пелистер, а за најдобра ракометарка Катерина Дамјаноска од редовите на ЖРК Ѓорче Петров.

Најдобри тренери во машка и женска конкуренција се Кирил Лазаров и Симе Симовски. Беа прогласени и најдобри играчи од страна на фановите, тие признанија ги добија Никола Митревски и Теодора Гулицоска. Кај мажите, номинирани беа 14 ракометари, фановите гласаа на социјалните мрежи и играчот со најмногу лајкови беше избран како најдобар по избор на публиката. И кај жените, номинирани беа 14 ракометарки, фановите на социјалната мрежа лајкнуваа на сликата на ракометарката што ја поддржуваат и бројот на гласовите одлучија која ќе биде победничка и крунисана.

Најдобри судии се Ѓорѓи Начевски и Славе Николов, најдобри стрелци Давид Димевски од МРК Куманово и Марија Анчева од РК Астибо, а најдобри странци Дмитро Хориха и Ана Вранчиќ.