Феникс 2010 загуби и од Рошток и се збогуваше со Европа
По поразот од 47 поени разлика против кипарскиот Керавнос, на квалификацискиот турнир од ФИБА Еврокупот во Никозија, кошаркарите на Феникс 2010 повторно беа совладани овојпат од германскиот Рошток со 72:101.
Македонскиот кошаркарски клуб Феникс 2010 го заврши својот настап во „Е“ квалификациската група од ФИБА Еврокупот со два високи порази. Нивниот втор неуспешен обид на турнирот во Никозија, означи и елиминација од евро-натпреварувањата на дебитантот во ФИБА Еврокупот.
На дуелот со Рошток, на истекот на првата четвртина Феникс 2010 заостануваше шест поени (16:22), но проблемите во играта, особено во одбраната, се појавија кога поради три лични грешки на клупата мораше да седна најискусниот во нивните редови, Бојан Трајковски.
Германскиот тим го искористи тој момент на „недостаток на сантиметри“ во рекетот на Феникс 2010, и до полувремето обезбеди висока предност (31:47). Со така скратена ротација, беше уште потешко за нашиот претставник во второто полувреме.
За Феникс 2010 најефикасен беше Рис со 19 поени, Хајнс-Цонс имаше 15, Даниел 12, а Зетов 10. Денеска од 18.00 часот Германците ќе го играат натпреварот за првото место во групата против Керавнос.