Фудбалерите на Фејенорд оваа недела наместо во Ротердам ќе тренираат во Белгија, а причината е новото засилување Рахим Стерлин кој сѐ уште нема работна дозвола за Холандија и не смее да тренира на холандска територија.

Поради тоа, тренерот Робин ван Перси одлучи екипата привремено да ја пресели во Тубиз, место оддалечено околу 137 километри од Ротердам, со цел 31-годишното крило што побрзо да се вклопи во новата средина.

„Рахим е една од причините за оваа одлука. Важно е да бидеме заедно што е можно повеќе за да изградиме вистински тимски дух“, порача Ван Перси.

Се очекува Стерлинг во текот на неделата да ја добие потребната дозвола, по што ќе може да конкурира за настап против Телстар во натпревар од холандскиот шампионат.

Во моментов, Фејенорд се наоѓа на втората позиција во холандското првенство, со 14 бода заостанување зад лидерот ПСВ.