ФОТО+ВИДЕО | Езеро во форма на срце прогласено за едно од најубавите во Европа
За сите што бараат бегство од летните горештини, гужвите и секојдневниот стрес, планинските предели сè почесто стануваат прв избор, а Австрија се наметнува како една од најпосакуваните дестинации. На речиси 2.000 метри надморска височина, меѓу импресивните врвови на најзападната австриска покраина Форарлберг, се наоѓа езерото Линерзее – едно од највпечатливите во целиот алпски регион.
Препорачано
Поради својата карактеристична тиркизна боја и форма која од одредени агли потсетува на срце, ова езеро важи за една од најфотографираните природни атракции во Австрија. Сместено е на крајот од долината Бранднертал и секоја година привлекува голем број планинари, фотографи и љубители на недопрена природа.
Според избор на австриската национална телевизија ОРФ во 2019 година, Линерзее е прогласено за најубаво место во земјата, пишува „Путни кофер“.
Езерото зафаќа површина од 1,12 квадратни километри, а неговата максимална длабочина достигнува 139 метри. Се наоѓа на 1.970 метри надморска височина, во подножјето на масивната планина Шезаплана, која со 2.965 метри е највисокиот врв на планинскиот венец Ретикон.
Иако првично било природно планинско езеро, во периодот од 1955 до 1958 година било проширено со изградба на брана и претворено во акумулација за потребите на хидроелектрана.
View this post on Instagram
Кога е целосно наполнето, езерото задржува околу 78,3 милиони кубни метри вода, што одговара на производство од приближно 262 милиони киловат-часови електрична енергија.
До овој алпски бисер посетителите можат да стигнат со жичарата Линерзебан, која трае само неколку минути. За љубителите на пешачењето, постои и планинската патека „Бозер Трит“, позната како „Злобен чекор“, која е стрмна и делумно обезбедена рута што води директно од паркингот до езерото.
Покрај горната станица на жичарата се наоѓа планинарскиот дом „Дагласхите“, каде посетителите можат да одморат и да вкусат традиционални австриски јадења.
View this post on Instagram
Интересно е што оригиналниот дом некогаш се наоѓал на полуостров на старото природно езеро, но по зголемувањето на нивото на водата бил преместен на повисока локација.
Линерзее привлекува и семејства и искусни планинари. Особено популарна е кружната патека околу езерото, која трае од еден до два часа и најчесто е лесна за движење. За поискусните планинари, од ова место започнуваат и потешки планински рути, вклучувајќи и искачување на врвот Шезаплана.
Посебна убавина на пределот му даваат алпските ливади, кои најмногу цветаат во јуни и јули, кога просторот е исполнет со рододендрони, енцијани, јаглики и планински цвеќиња.
Целата област меѓу Линерзее и Шезаплана од 1966 година има статус на заштитен пејзаж.
Иако водата е кристално чиста и богата со пастрмки, капењето во езерото е строго забрането бидејќи се користи како акумулација за производство на електрична енергија. Сепак, таа забрана не ја намалува неговата популарност, која од година во година постојано расте.
