Македонскиот женски првак во одбојка Јанта Волеј КВ откако испиша историја успешно минувајќи ја првата пречка, европската приказна во ЦЕВ Лигата на шампионите ја продолжува на почетокот на следниот месец.

Нашиот претставник со две победи од по 3:2 успеа да го елиминира Гацко од Босна и Херцеговина.

Клубот објави дека во рамките од третото коло од квалификациите за елитното клупско натпреварување на 4 ноември во СЦ „Јане Сандански“ во Скопје, од 18.00 часот ќе го пречека следниот предизвик – францускиот претставник Волеро Ле Кане.

Како и за првиот меч пред домашната публика, така и во овој дуел влезот во салата „Јане Сандански“ ќе биде слободен за сите симпатизери на клубот и љубители на одбојката.

Реванш дуелот од оваа фаза Јанта Волеј КВ ќе го игра на 13 ноември на гостински терен.