Ракометарите на Еурофарм Пелистер го запишаа вториот пораз во Европската лига на ЕХФ, откако во салата „Боро Чурлевски“ загубија од Фуксе Берлин со високи 34:43 (14:22).

Избраниците на Ларс Валтер парираа на стартот, но расположениот германски ривал се одлепи пред паузата, а во продолжението само ја потврди победата во Битола.

Само на почетокот македонскиот вицешампион го контролираше резултатот, трипати минимално водеше со 1:0, 2:1 и 3:2. При негатива од 6:7 гостите направија серија од 4:1 што се покажа како клучно за понатамошниот тек на средбата.

На паузата Германците заминаа со уште поголема предност од „плус осум“, а во вториот дел истата само растеше, стана и двоцифрена, која ја одржуваше фаворитот до самиот крај на овој дуел.

Кај стрелците Пешевски во редовите на Е. Пелистер беше најефикасен со осум погодоци, шест имаше Радовиќ, а по пет Таноски и Костески. На спротивната страна за моментно водечкиот во Бундеслигата Вујовиќ имаше девет голови, а седум беа дело на Холм.

На табелата во групата „Д“ води Фуксе Берлин со шест бодови, додека Е. Пелистер е на четвртото место со два. Во следното коло битолчани во Германија на 29 ноември ќе игра против украинскиот Мотор Запорожје, а Фуксе Берлин истиот ден ќе биде домаќин на португалскиот Агуас Санташ.