Американецот Кларк Кегли објаснил што доживеал кога стигнал до таа точка и влијанието што апстиненцијата го има врз телото и умот.

Кларк Кегли рекол дека престанал да пие не затоа што го допрел „дното“, туку поради „момент на јасност“ во кој се запрашал дали сака да продолжи да пие и на 50 години. Сфатил дека одговорот е „не“.

Почнал со одлуката дека нема да пие 30 дена, но тој период се продолжил на повеќе од 1.400 дена апстиненција. Во својата приказна, тој споделил што се случувало со неговото тело додека доживувало различни пресврти.

Кегли истакнал дека првите 48 часа биле ужасни. Морал постојано да се потсетува дека „чувството без мамурлак е подобро од чувството на пијанство“. По една недела апстиненција, се појавила силна желба за солена и слатка храна, а морал свесно да се воздржи да не се напие алкохол од навика, бидејќи тоа станало дел од неговата рутина.

По 30 дена, забележал огромно подобрување во квалитетот на сонот, додека по 60 дена сфатил дека му е неверојатно здодевно. Тогаш станал свесен колку време во неговиот живот, всушност, му одземало пиењето.

За него, границата од 90 дена бил моментот во кој „навистина забележал промени во расположението, креативноста и менталната функција“. Кегли рекол дека потоа се ослободил од она што го нарекува „магла“, чувство што го споредил со разликата помеѓу состојбата пред и по утринското кафе.

– Потребни се околу 90 дена за хемијата на мозокот повторно да се урамнотежи – рекол Кегли.

Најновите клинички истражувања го потврдуваат ова, истакнувајќи 90 дена како клучен праг за невролошко закрепнување, што доведува до поостри когнитивни функции и значително намалување на желбата за алкохол.

Меѓутоа, Кегли предупредил на „стапица“ што може да се појави непосредно пред оваа пресвртница. Тој објаснил дека во периодот до 90 дена можете да „се чувствувате поанксиозно и под поголем стрес, дури и кога сте трезни“, што може да ве наведе повторно да посегнете по алкохол за да се опуштите. Тоа е стапица, бидејќи на крајот завршувате со повисоки основни нивоа на кортизол, хормонот на стрес, пишува „ЛАДБајбл“.

– Значи, се чувствувате поанксиозно и под стрес. Затоа повторно пиете и тоа станува маѓепсан круг во кој секогаш сте вознемирени. И самиот доживеал некоја верзија од тоа, но тврди дека „деведесеттиот ден е огромна пресвртница по која сето тоа исчезнува – објаснил тој.

Освен подобар сон и фокус, апстиненцијата во текот на 90 дена носи бројни други здравствени придобивки. Поради намалениот внес на калории од алкохолот, веројатно ќе ослабете, а крвниот притисок ќе се намали. Со тоа се намалува ризикот од срцеви заболувања.

Неодамнешните студии покажуваат и дека црниот дроб има неверојатен капацитет за регенерација. По само неколку недели, масните промени на црниот дроб почнуваат да се повлекуваат, а во рок од шест месеци од целосна апстиненција, штетата предизвикана од умерено пиење може целосно да се поправи. Исто така, се обновуваат природните циклуси на спиење, што директно влијае на намалувањето на симптомите на анксиозност и депресија.

Глобалните трендови покажуваат дека сè повеќе луѓе избираат трезвеност или „свесно пиење“. Движењата како „Сув јануари“ стануваат сè попопуларни, а пазарот за безалкохолни пива, вина и жестоки пијалаци е во подем, потврдувајќи дека поместувањето кон поздрав начин на живот стана глобален феномен.