Турскиот претседател Реџеп Таип Ердоган алармираше за ниската стапка на наталитет во Турција, наведувајќи дека „нашите жени раѓаат многу малку деца, доживуваме катастрофа“. Тој додаде, дека стапката на раст на турското население драматично се намалува, пренесува турската агенција Анадолу.

-Преземаме потребни мерки против наметнувања како што се десексуализација и перверзни струи како што се ЛГБТКИ, и не дозволуваме ни најмала отстапка, небрежност или опуштање. Населението на Турција се зголемува, но стапката на раст на нашето население се намалува.Вкупната стапка на фертилитет е под нивото на самообновување на населението. Според податоците објавени од TÜIK (Турски институт за статистика), вкупната стапка на фертилитет измерена минатата година била 1,48. Моментално доживуваме катастрофа. Оваа стапка е далеку под нивото на самообновување на населението од 2,10. Алармот ѕвони многу гласно за нашата иднина. Никој на кого му е грижа за иднината на оваа земја не може да остане рамнодушен кон ова – рече Ердоган.

Претседателот Ердоган се обрати на завршната сесија на Симпозиумот „Семејство и култура-уметност“ што се одржа во Конференциската сала на Националната библиотека Бештепе.

Ердоган изјави дека активно се борат против содржини што се насочени кон поединци, семејства, општествена структура и свети вредности на социјалните медиуми и дигиталните платформи.

Претседателот Ердоган изјави дека според податоците за 2022 година, вкупната стапка на фертилитет кај вработените жени е 1,38, додека вкупната стапка на фертилитет кај жените кои не се во процес на вработување е 1,72, и продолжи:

-Со други зборови, се покажува дека работниот живот има ограничено влијание врз стапката на плодност, а и дека невработените жени имаат намален број на деца. Главниот фактор за ова е несомнено зголемената изолација на жените во градот. Морам јасно да го кажам ова овде. Господа, без намера за навреда, но жените честопати немаат потребна поддршка од своите сопрузи кога станува збор за одгледување деца. За жал, голем дел од товарот паѓа на рамената на жените. Сепак, нашиот Пророк, мир и благослов нека бидат врз него, кој е најдобар пример за нас во семејниот живот, рекол: „Жените, заедно со мажите, се другите половини од една целина“. Да, токму тоа е случајот. Ова е ‘рбетот на нашиот менталитет, нашата социјална и семејна структура. Ова е она што нашата вера ни заповеда да го правиме – нагласи Ердоган.

Тој изјави дека татковците, исто како и мајките, имаат одговорност да ги воспитуваат своите деца како поединци кои се корисни за нивните семејства, општеството и човештвото.

-Научните истражувања покажуваат дека заедничкиот интерес на родителите за своите деца не само што го зголемува нивниот успех во образованието, туку и во секој аспект од животот. Затоа, ги повикувам сите татковци на деца да бидат од поголема помош и повеќе да ги поддржуваат своите сопруги, а особено да поминуваат повеќе квалитетно време со своите деца – рече турскиот претседател во обраќањето.