ЕП 2022: Норвешка по 25 години ја победи Шпанија и остана во игра за полуфинале
Селекцијата на Норвешка го совлада актуелниот европски шампион Шпанија со 27:23 и остана во игра за пласман во полуфиналето на ЕП кое се игра во Унгарија и Словачка.
Норвежаните во директен дуел со Шведска ќе одлучат за патникот во полуфиналето, додека Шпанија во последното коло од главната рунда ќе игра со отпишаната Полска и доволен и е бод за полуфинале.
Ова воедно беше прва победа за Норвешка над Шпанија на големите натпреварувања по цели 25 години.
Шпанија го отвори натпреварот со водство од 0:2, но одговорот на Норвежаните беше серија од 5:0 со која го презедоа водството и не го испуштија до крајот на натпреварот.
На полувреме беше 14:11, а во вториот дел Шпанија најблиску дојде до минус два (21:19), но немаше сила да се врати во игра. На крајот Норвешка славеше со 27:23.
Себастијан Бартхолд со шест гола беше најдобар кај Норвешка, додека во редовите на Шпанија, Хорхе Македа постигна исто така шест гола.
Резултати:
Група 2
Полска – Русија 29:29
Германија – Шведска 21:25
Шпанија – Норвешка 23:27
Табела: Норвешка 6, Шведска 6, Шпанија 6, Русија 3, Германија 2, Полска 1.