ЕМА за вакцината на „Фајзер“ и на „БајонТек“: Ефикасноста на „Комитнати“ е во 95 отсто од случаите
Вакцината „Комитнати“, што е произведена од компаниите „Фајзер“ и „БајонТек“ и денеска беше препорачана за употреба од Европската агенција за лекови (ЕМА), покажува ефикасност во 95 проценти во спречување на заразата со ковид-19 кај лица постари од 16 години.
– Од вакцината се даваат две дози во период од 21 ден и не покажа сериозни несакани ефекти, соопшти ЕМА.
Во испитувањето на вакцината „Комитнати“ учествуваа околу 44.000 луѓе, од кои пола примиле вакцина, а пола плацебо. Ефикасност имала кај повеќе од 36.000 лица на возраст над 16 години, вклучително и оние над 75 години кои немале знаци на претходна инфекција.
Студијата покажа дека за 95 отсто е намален бројот на симптоматски случаи на ковид-19 кај лицата кои примиле вакцина, осум од 18.198 случаи добиле симптоми на корона, додека плацебо примиле 18.325 од кои 162 луѓе имале симптоми на ковид-19.
Испитувањето покажа околу 95 отсто ефикасност кај учесниците со ризик од тежок облик на ковид-19, вклучително и лицата со астма, хронични белодробни болести, дијабетес, висок крвен притисок или индекс на телесната маса над 30.
ЕМА истакнува дека вакцината има висока ефикасност како меѓу половите, така и меѓу расите и етничките групи.